काठमाडौँ । नेपाल र दक्षिण कोरियाका निर्माताको सहकार्यमा निर्माण हुन लागेको कथानक फिल्म ‘ग्रान्ड एभरेस्ट आश्रम’ निर्माण हुने भएको छ।
बोकल्ट फिल्म्स र काठमाडौँ फिल्म्सको सहकार्यमा निर्माण हुन लागेको यस फिल्ममा दक्षिण कोरियाका निर्माता, निर्देशक तथा लेखक बोइम ह्वाङ र काठमाडौँ फिल्म्सका संस्थापक तथा नेपाली सह निर्माता चन्दन झा जोडिएका छन्।
यस फिल्मलाई रोमान्टिक कमेडी तथा सुपरनेचुरल जनरामा निर्माण गर्न लागिएको प्रेषित विवरणमा जनाइएको छ । यसमा के-ड्रामाको स्वाद पनि मिश्रण गरिने जनााइएको छ ।
यो फिल्मको कथा पूर्व के-पप स्टार र एक युवा नेपाली गुरु तथा होटेल सञ्चालकबीच विकसित हुने अनपेक्षित प्रेम सम्बन्धमा आधारित छ। प्रेम, हाँस्य र रहस्यको संयोजनमार्फत फिल्मले आधुनिक सेलिब्रेटी संस्कृति र नेपालको आध्यात्मिक परिवेशबीचको रोचक सम्बन्धलाई प्रस्तुत गर्नेछ। साथै, प्रेम, पहिचान र बाहिरी देखावट तथा वास्तविकताबीचको भिन्नतालाई कथामा समेटिनेछ।
फिल्मको शीर्ष भूमिकामा नेपाली अभिनेता अरुण क्षेत्री छनोट भएका छन्। शीर्ष महिला अभिनेत्रीमा दक्षिण कोरियाली अभिनेत्रीलाई कास्ट गर्ने निर्माताले जनाएका छन् ।
ती अभिनेत्रीको नाम चाँडै सार्वजनिक गरिने निर्देशक ह्वाङले बताइन्। निर्माण तथा सिर्जनात्मक समूहमा निर्माता, निर्देशक तथा लेखक बोइम ह्वाङ, सह निर्माता चन्दन झा, छायाङ्कन निर्देशक नरेन्द्र मैनाली, लाइन प्रोड्युसर प्रकाश हमाल, क्रिएटिभ डाइरेक्टर, कास्टिङ डाइरेक्टर, भाषा तथा अभिनय प्रशिक्षक एवं क्यारेक्टर डाइरेक्टर उत्पल झा रहेका छन्।
निर्माताले भनेका छन्, ‘हिमाल र पदयात्राका परिचित दृश्यभन्दा फरक, ‘ग्रान्ड एभरेस्ट आश्रम’ले एउटा अनौठो तथा अलौकिक प्रेमकथामार्फत नेपालको फरक पक्ष प्रस्तुत गर्नेछ, जहाँ आध्यात्मिक र सामान्य जीवनबीच निरन्तर रोचक द्वन्द्व र अन्तरक्रिया देख्न पाइनेछ।’

पटकथा लेखक तथा निर्देशक बोइम ह्वाङले नेपालप्रतिको आफ्नो आत्मीयताबारे भनिन्, “विगतका वर्षमा पटक–पटक नेपाल भ्रमण गर्ने क्रममा यस देश र यहाँका मानिसप्रति मेरो गहिरो आत्मीयता बढेको छ। नेपालमा रहेको आकर्षण, अनौठोपन र आध्यात्मिक वातावरणलाई आफ्नै सिनेम्याटिक दृष्टिकोणमार्फत पर्दामा उतार्न चाहेकी हुँ।’
यस सहकार्यले नेपाल र दक्षिण कोरियाबीचको सांस्कृतिक तथा सिर्जनात्मक सम्बन्धलाई थप मजबुत बनाउने अपेक्षा गरिएको निर्माताले जनाएका छन् ।
फिल्मलाई विश्वव्यापी थिएटर प्रदर्शन तथा अन्तर्राष्ट्रिय फिल्म फेस्टिभललाई लक्षित गरी निर्माण गरिने सह निर्माता चन्दन झाले बताए। नेपाल, दक्षिण कोरिया, उत्तर अमेरिका र युरोपका दर्शकलाई लक्षित गरिएको यस फिल्मलाई स्ट्रिमिङ प्लेटफर्ममार्फत पनि रिलिज गर्ने योजना रहेको जनाइएको छ ।
छायाङ्कन सन् २०२७ फेब्रुअरीदेखि नेपालमा सुरु गरी मार्चसम्म जारी राख्ने प्रारम्भिक योजना छ। नेपाली पात्रोअनुसार यो अवधि माघदेखि चैत २०८३ सम्म पर्दछ।