एजेन्सी । भारतले साउदी अरबमा नागरिक तथा ऊर्जा पूर्वाधारलाई लक्षित गरी भइरहेका निरन्तर आक्रमणको कडा निन्दा गरेको छ।
पछिल्लो समय दमामस्थित किङ फहद अन्तर्राष्ट्रिय विमानस्थल र साउदीको पूर्वी प्रान्तस्थित शैबाह तेल क्षेत्रमा लक्षित आक्रमण भएका थिए। भारतले यस क्षेत्रमा यथाशीघ्र शान्ति र सामान्य अवस्था फर्किने आशा पनि व्यक्त गरेको छ।
भारतको विदेश मन्त्रालयले जारी गरेको विज्ञप्तिमा भनिएको छ, ‘हामी साउदी अरबमा नागरिक तथा ऊर्जा पूर्वाधारमाथि भइरहेका निरन्तर आक्रमणको कडा निन्दा गर्दछौँ। यसमा अक्टोबर २१ मा दमामस्थित किङ फहद अन्तर्राष्ट्रिय विमानस्थल र पूर्वी प्रान्तस्थित साउदी अराम्कोको शैबाह तेल क्षेत्रमा भएको आक्रमण पनि समावेश छ। दुर्भाग्यवश, यी आक्रमणमा सर्वसाधारणको मृत्यु हुनुका साथै मानिसहरू घाइते भएका छन्।’
विदेश मन्त्रालयका अनुसार दमाम विमानस्थलमा भएको आक्रमणमा एक भारतीय नागरिकको दुःखद मृत्यु भएको छ भने अन्य दुई भारतीय नागरिक घाइते भएका छन्। त्यस्तै, शैबाह तेल क्षेत्रमा भएको आक्रमणमा अर्का एक भारतीय नागरिक घाइते भएका छन्।
मन्त्रालयले मृतकका परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ।
विदेश मन्त्रालयले भारतीय दूतावास रियादले साउदी अधिकारीहरूसँग सम्पर्क गरिरहेको र आवश्यक सबै सम्भव सहयोग उपलब्ध गराउने जनाएको छ। साथै, साउदी अरबको सार्वभौमिकताको रक्षा गर्ने विषयमा भारतले ऐक्यबद्धता व्यक्त गरेको छ।
यसअघि साउदी अरबस्थित भारतीय दूतावासले बुधबार दमामको किङ फहद अन्तर्राष्ट्रिय विमानस्थलमा भएको आक्रमणमा एक भारतीय नागरिकको मृत्यु भएको र अन्य दुई भारतीय नागरिक घाइते भएको जानकारी दिएको थियो।
दूतावासले घटनाबारे थप विवरण संकलन गरिरहेको र प्रभावित परिवारहरूसँग सम्पर्क गरिरहेको जनाएको थियो।
यसैबीच, साउदी अरबको नागरिक उड्डयन महानिर्देशनालय ९जीएसीए०ले बुधबार किङ फहद अन्तर्राष्ट्रिय विमानस्थललाई लक्षित गरी भएको आक्रमणमा एक भारतीय आवासीय व्यक्ति र एक साउदी नागरिकसहित दुई जनाको मृत्यु भएको जनाएको छ। उक्त घटनामा अन्य आठ जना घाइते भएको पनि प्राधिकरणले जानकारी दिएको छ।
विज्ञप्तिअनुसार घाइतेको संख्या आठ नै रहेको छ। घाइते हुनेमा एक साउदी नागरिक, दुई भारतीय, दुई यमनी, दुई बंगलादेशी र एक नेपाली नागरिक रहेका छन्। उनीहरूको चोटपटक सामान्यदेखि गम्भीर अवस्थासम्मको रहेको र विभिन्न अस्पतालमा आवश्यक उपचार भइरहेको प्राधिकरणले जनाएको छ।
जीएसीएका अनुसार क्षतिको मूल्याङ्कन पूरा गर्न, विमानस्थलका संरचनाहरूको सुरक्षा जाँच गर्न तथा यात्रु र कर्मचारीको सुरक्षा सुनिश्चित गर्न सम्बन्धित निकायसँग समन्वय भइरहेको छ। साथै, साउदी अरबको नागरिक उड्डयन प्रणालीको सुरक्षा कायम राख्न आवश्यक उपायहरू अवलम्बन गरिँदै छन्।
प्राधिकरणले आक्रमणपछि विमानस्थलको सञ्चालन पुनः सुरु भएको र हवाई यातायात सामान्य अवस्थामा फर्किएको पनि जनाएको छ। एएनआई
