जेरुसेलम, (एएफपी) । इजरायलमा गठबन्धन सरकार गठनको सम्भावना खोज्दै कार्यवाहक प्रधानमन्त्री बेन्जामिन नेतान्याहु र उनका राजनीतिक प्रतिद्वन्द्वी गदी इसेनकोटका दलले वार्ता पुनः सुरु गरेका छन् ।
अक्टोबरमा भएको निर्वाचनबाट कुनै पनि राजनीतिक समूहले स्पष्ट बहुमत प्राप्त गर्न नसकेपछि नयाँ सरकार गठनका लागि दुवै पक्षबीच छलफल अघि बढेको हो ।
इसेनकोटको याशर पार्टी र नेतान्याहुको लिकुड पार्टीका प्रतिनिधिहरू आइतबार तेल अभिभनजिकै हर्जलियास्थित एक होटलमा लगातार दोस्रो दिन वार्तामा बस्दैछन् । उनीहरूबीच स्थानीय समयअनुसार दिउँसो १ बजे छलफल हुने तय भएको छ ।
पूर्व सेना प्रमुख इसेनकोटलाई सरकार गठनका लागि डिसेम्बर ६ सम्मको समय दिइएको छ । आवश्यक परे उनले थप १४ दिनको समय पाउन सक्नेछन् तर, सरकार गठनका लागि अतिवादी अर्थोडक्स यहुदी दल, अरब दल वा लिकुडसँग राष्ट्रिय एकता सरकारमध्ये कुन विकल्प रोज्ने भन्ने विषयमा उहाँको समूहभित्र मतभेद छ ।
याशर पार्टीले शनिबार वार्ता पुनः सुरु हुनुलाई सम्भव भएसम्म व्यापक सरकार गठन गर्ने वास्तविक प्रतिबद्धताका रूपमा व्याख्या गरेको थियो । इसेनकोटले आफ्ना प्रतिनिधिहरूलाई सबै सम्भावित विकल्पमा छलफल गर्न निर्देशन दिनुभएको बताइएको छ ।
तर, लिकुडले नेतान्याहुको नेतृत्वमा बन्ने एकता सरकारमा सहभागी हुन विभिन्न सर्त अघि सारेको छ । उसले नेतान्याहु र उनको सरकारविरुद्ध व्यक्तिगत आक्रमण तथा घृणा फैलाउने गतिविधि रोक्नुपर्ने माग गरेको छ । साथै, अरब दललाई सहभागी नगराई इजरायललाई यहुदी जनताको राष्ट्रका रूपमा समर्थन गर्ने सबै पक्षलाई सरकारमा समेट्नुपर्ने उसको प्रस्ताव छ ।
अरब दलहरूले संसदमा १९ सिट जितेका छन् । उनीहरू नेतान्याहुको सत्तामा निरन्तरताको विपक्षमा छन् । लिकुडले प्यालेस्टिनी राज्य स्थापनाको विरोध, सिरिया, लेबनान र गाजा क्षेत्रमा इजरायली नियन्त्रण कायम राख्ने तथा अतिवादी अर्थोडक्स यहुदीलाई अनिवार्य सैनिक सेवामा समावेश गर्ने विषयमा पनि सहमति खोजेको छ ।
इजरायलमा यसअघि प्रयोग भइसकेको प्रधानमन्त्री पद आलोपालो सम्हाल्ने व्यवस्थाका आधारमा दुई नेताबीच एकता सरकार बन्न सक्ने सम्भावना भए पनि इसेनकोटले नेतान्याहुको नेतृत्वमा सरकारमा सहभागी हुन अस्वीकार गरेका छन् । पूर्वप्रधानमन्त्री नफ्ताली बेनेटले पनि शनिबार नेतान्याहु वा उनको समूहसँग कुनै पनि अवस्थामा गठबन्धन नगर्ने अडान दोहोर्याएका छन् ।
शुक्रबार इसेनकोटले वार्ता अघि नबढे संसदमा ‘आपत्कालीन राष्ट्रिय सरकार’ गठनको प्रस्ताव लैजान आफू तयार रहेको बताएका थिए । उनले विस्तृत योजना सार्वजनिक नगरे पनि विपक्षी दलहरू मिलेर पहिले अल्पमतको सरकार गठन गर्ने र त्यसपछि त्यसलाई विस्तार गर्ने रणनीति अपनाउन सक्ने सङ्केत देखिएको छ ।