काठमाडौं । चर्चित भारतीय गायक नवजोत आहुजा नेपाल आएका छन् । उनी मंगलबार बेलुका नेपाल आएका हुन् । बुधबार ठमेलस्थित क्लब नोभामा उनले प्रस्तुति दिनेछन् । क्लब नोभाले स्थापनाको पहिलो वार्षिकोत्सव मनाउँदै छ ।
सोही अवसरमा क्लबले आयोजना गरेको सांगीतिक कार्यक्रमका लागि गायक आहुजा नेपाल आएका हुन् । जहाँ उनले ‘तेरे लिए मंदिर जाऊँ, तेरे नाम का दिया जलाऊँ’ लगायत थुप्रै गीतमा दर्शकलाई झुमाउनेछन् ।
‘तेरे लिए मंदिर जाऊँ, तेरे नाम का दिया जलाऊँ’ आहुजाको सांगीतिक यात्राको सबैभन्दा हिट गीत हो । यो गीत उनको ‘खत’ एल्बममा समावेश छ । त्यसबाहेक उनका तू ही हूँ, खुद से मोहब्बत, इन्तजार मेरे हो तुम, चले गएलगायत दजनौं गीत चर्चित छ ।
गायक आहुजा पहिलोपटक नेपाल आएका हुन् । नेपाल आएसँगै सञ्चारकर्मीसँग कुरा गर्दै उनले नेपालीहरूमाझ आफ्नो प्रस्तुति दिन निकै उत्सुक रहेको बताए । ‘म पहिलोपटक नेपाल आएको हुँ । मलाई नेपाल मन पर्छ । नेपाली संस्कार र संस्कृति राम्रो लाग्छ,’ उनले भने, ‘नेपाली दर्शकमाझ आफ्नो प्रस्तुति दिन म निकै उत्सुक छु ।’
नेपाली संगीतप्रति आफ्नो झुकाव देखाउँदै उनले नेपाली गीत पनि सुन्ने गरेको बताए । साथै कुनै नेपाली संगीतकारले गीत गाउन अफर गरेमा आफू राजी रहेको उनको भनाइ थियो ।
उनको नेपाल बसाइ तीन दिन रहनेछ । यही दौरानमा उनी काठमाडौंका धार्मिक तथा पर्यटकीय स्थलको विशेष भ्रमण गर्नेछन् ।
क्लब नोभाको सेलिब्रेसन कार्यक्रम बुधबार राती ९ बजे सुरु हुनेछ । पहिलो वार्षिकोत्सव भएकोले सेलिब्रेसनमा आमन्त्रित पाहुनालाई बढी प्राथमिकता दिएको नोभाका संस्थापक विशाल तुलाचनले बताए ।
‘हामीले पहिलापटक नोभाको सेलिब्रेसन गर्न लागेका हौँ । सेलिब्रेसन कार्यक्रममा दर्शक भन्दा पनि आमन्त्रित पाहुनालाई बढी प्राथमिकता दिएका छौं,’ उनले भने, करिब ९० प्रतिशत आमन्त्रित पाहुना र १० प्रतिशत मात्र टिकट ब्रिकीका लागि राखिएको छ ।’ कार्यक्रममा गायक आहुजाको मात्रै प्रस्तुति रहेको उनले बताए ।
